Dünən Naxçıvan Dövlət Universitetində “Dövlət idarəçiliyində innovativ texnologiyalar: Azərbaycan Respublikasının təcrübəsi” mövzusunda distant təlim keçirilib.
Təlimin əsas məqsədi ölkənin innovativ və inklüziv inkişafı üçün hədəflərin yeni istiqamətləri ilə bağlı biliklərin dinləyicilərə çatdırılması və onlarla fikir mübadiləsinin aparılması olub.
Muxtar respublikanın şəhər və rayon İcra hakimiyyətlərində Sosial-iqtisadi inkişafın təhlili və proqnozlaşdırılması şöbəsinin aparıcı, baş və böyük məsləhətçisi vəzifələrində çalışan əməkdaşların iştirak etdiyi təlimdə Azərbaycan Respublikasının Prezidenti yanında Dövlət İdarəçilik Akademiyasının rektoru, akademik Urxan Ələkbərov məruzə ilə çıxış edib.
Azərbaycan Respublikasının Prezidenti cənab İlham Əliyevin 2017-ci il 22 sentyabr tarixli Fərmanının icrası ilə əlaqədar təşkil edilən təlimdə akademik ümummilli lider Heydər Əliyev siyasətinin uğurlu nəticələrindən danışıb, ulu öndərin ideyalarının Prezident cənab İlham Əliyev tərəfindən qətiyyətlə həyata keçirildiyini bildirib və bu gün Azərbaycanın iqtisadiyyatının sürətlə inkişaf etdiyini konkret faktlarla diqqətə çatdırıb.
Vurğulanıb ki, Azərbaycan Respublikası müstəqilliyini 28 il öncə bərpa etməsinə baxmayaraq, ümummilli liderin rəhbərliyi ilə qısa zamanda inklüziv və davamlı inkişaf siyasəti reallaşdırmağa müvəffəq olub. Bir sıra iqtisadi və sosial göstəricilərinə görə müasir Azərbaycan Respublikası hazırda yüzillik tarixi olan və dünya liderləri sayılan ölkələrlə rəqabət aparmaq iqtidarındadır. Dövlətimizin başçısının tətbiq etdiyi və dünya miqyasında ilk dəfə işlənilmiş sinergetik, kompensator idarəçilik texnologiyaları sayəsində Azərbaycanın inklüziv inkişaf indeksinin Avropa İttifaqına üzv olan bir çox dövlətlərin göstəricilərindən yüksək olduğu qeyd edilib.
Məruzədə beynəlxalq təşkilatlar tərəfindən 2018-2019-cu illərdə dərc edilmiş rəsmi statistik bilgilər təhlil olunub.
Təlimin sonunda iştirakçıların mövzu ilə bağlı sualları cavablandırılıb.
Güntac ŞAHMƏMMƏDLİ
