İyulun 21-də 2013/2014-cü tədris ili üçün Azərbaycan Respublikasının ali təhsil müəssisələrinə və tam orta təhsil bazasından orta ixtisas təhsili müəssisələrinə I ixtisas qrupu üzrə qəbul imtahanı keçirilib. Muxtar respublikada Naxçıvan şəhər 1, 7 və 14 nömrəli tam orta məktəblərdə keçirilən imtahanlarda 1713 abituriyent iştirak edib. İmtahana 167 nəzarətçi-müəllim, 14 imtahan rəhbəri cəlb olunub.
Gənclərimizin biliyinin sınaq günündə məktəblərdə olduq, abituriyentlər və onların valideynlərindən təəssüratlarını öyrəndik.
Naxçıvan şəhərindən olan Hacıağa Bağırov qızına dəstək üçün imtahana gəlib. Deyir ki, qızım Ceyran imtahana yaxşı hazırlaşıb. İnanıram ki, qəbul imtahanında uğur qazanacaq. Valideyn ərazidə insanların rahatlığı üçün iaşə xidmətinin təşkil olunmasından da razılıqla danışdı.
Abituriyentlərdən Tellər Quluzadə ilə söhbətləşirik. Culfa rayonunun Saltaq kənd tam orta məktəbinin məzunudur. O, sınaq imtahanlarında 650 bal toplayıb. Həyəcanını gizlətməyərək deyir:
– Çox həyəcanlıyam. Hansı sualların düşəcəyini səbirsizliklə gözləyirəm. Mühəndis olmaq istəyirəm. İnanıram ki, bu arzuma çatacağam.
Şahbuz rayonunun Kükü kəndindən olan İlahə Əliyeva da çox həyəcanlı görünür. Onun dediklərindən:
– Həyəcanla gözlədiyim gündür. Mən sınaq imtahanlarında 550-dən yuxarı bal toplayırdım. İnanıram ki, qəbul imtahanında da bu nəticəni göstərəcəyəm.
Culfa rayonunun Nəhəcir kəndindən olan Aygün Babayeva, Culfa şəhərindən Rasim Muradov da belə düşünürlər.
Saatlar 1100-i göstərəndə imtahan başlayır. İmtahan qurtarana kimi biz də imtahanda müşahidələrimizi apardıq. Naxçıvan şəhər 7 nömrəli tam orta məktəbdə keçirilən imtahanların gedişi zamanı abituriyentlər heç bir qayda pozuntusuna yol verməyərək diqqətlərini ancaq test tapşırıqlarına yönəltdilər. Ümumiyyətlə, imtahanda təşkilatçılıq yüksək səviyyədə idi.
...Nəhayət, imtahan başa çatır. İmtahandan yenicə çıxmış Şahbuz rayonundan olan Aysel Quliyeva ilk dəqiqələrin onun üçün bir az çətinlik törətdiyini gizlətmədi. Aysel deyir ki, imtahan otağında təmin olunan sakitlik təsirsiz ötüşməyib və o, imtahanın qalan müddətində məhsuldar işləyə bilib. Ümidvardır ki, nəticə ürəkaçan olacaq. Daha bir abituriyent İlkanə Əhmədova dedi ki, imtahanda əsas amil olan sakitlik tam təmin edilmişdi. Bu da onun sualları dəqiq cavablandırmasına imkan verib.
Sara ƏZİMOVA
