“Naxçıvan” Universitetində Naxçıvan Muxtar Respublikası Gənclər Fondu və “Naxtel” MMC-nin birgə təşkilatçılığı ilə “Gələcəyə doğru” adlı tədbir keçirilib.
“Tələbə paketi”nin təqdimatı məqsədilə keçirilən bu tədbirdə Naxçıvan Muxtar Respublikası Gənclər Fondunun Gənclər təşkilatları və gənclər ilə iş şöbəsinin baş mütəxəssisi Arzu Qasımov bildirib ki, muxtar respublikamızda gəncliyin hərtərəfli inkişafı, müasir dünyagörüşünə yiyələnməsi, innovativ bilik və bacarıqlara malik olması daim diqqət mərkəzində saxlanılır, gənclər üçün bir çox yeniliklər təqdim olunur. Onların yüksək texnologiyalara maraqlarının artırılması istiqamətində uğurlu proqramlar icra edilir, təşəbbüsləri dəstəklənir. Bu gün təşkil olunan “Gələcəyə doğru” adlı tədbirdə “Tələbə paketi”nin təqdimatı da tələbə-gənclərimiz üçün bu istiqamətdə atılan addımların davamıdır.
“Naxtel” MMC-nin əməkdaşı Səfər Hüseynli çıxışında bildirib ki, şirkət 2015-ci ilin iyul ayında Naxçıvan şəhərində təsis olunub. Ötən müddətdə cəmiyyət bir çox yeniliklərə imza atıb. 2016-cı il oktyabr ayının 25-də Naxtel 4G mobil rabitə şəbəkəsi istifadəyə verilib.
Qeyd olunub ki, bu gün tələbələr üçün təqdim olunan “Tələbə paketi” Azərbaycan Respublikasının bütün üniversitet və kolleclərində təhsil alan tələbələrə şamil olunur. Tələbə olan hər kəs öz tələbə bileti ilə Naxçıvan Muxtar Respublikasında fəaliyyət göstərən “Naxtel” Müştəri Xidmətləri mərkəzlərinə yaxınlaşaraq xüsusi kateqoriyaya ayrılmış nömrələrdən istədiyini pulsuz əldə edə bilər.
Bildirilib ki, ay ərzində yüklənən məbləğ 3 manatdan 5,99 manata kimi olduqda 300, 6 manatdan 8,99 manata kimi olduqda 600, 9 manatdan 11,99 manata kimi olduqda 900, 12 manatdan 14,99 manata kimi olduqda 1200, 15 manatdan 17,99 manata kimi olduqda 1500, 18 manat və yuxarı ödənişlərə isə 1800 meqabayt internet trafiki hədiyyə olunacaq.
Sonra tələbələr arasında intellektual oyunlar keçirilib və qaliblər “Naxtel” MMC tərəfindən ödəmə kartları, prestij nömrələr, datakartlar, və Huawei GR 5 mobil telefonu ilə mükafatlandırılıblar.
Gülcamal TAHİROVA
