Ordubad rayonundakı Aza kənd tam orta məktəbində “Kitabi Dədə-Qorqud” dastanının müzakirəsi keçirilib. Tədbiri giriş sözü ilə məktəbin direktoru Təvəkkül Məmmədov açıb.
Vurğulanıb ki, “Kitabi-Dədə ­Qorqud” dastanı xalqımızın ən böyük ədəbi abidəsidir. Dədə Qorqud boylarının əsas mahiyyətini yurdun və xalqın qorunması, xeyir qüvvələri təmsil edən qədim oğuzların yadelli işğalçılara – şər qüvvələrə qarşı ölüm-dirim savaşı, öz əhəmiyyətini indi də itirməyən bir çox əxlaqi-­didaktik görüşlər təşkil edir.

Dastanın ideya-bədii xüsusiyyətləri barədə danışan məktəbin ədəbiyyat müəllimi İradə Zeynalova bildirib ki, dünya mədəniyyətinə çox böyük töhfələr vermiş Azərbaycan xalqının ən möhtəşəm tarixi abidəsi “Kitabi-Dədə Qorqud” dastanıdır. VII əsrdən üzübəri ozanların oğuz yurdunu oymaq-oymaq gəzib yaydıqları “Kitabi-Dədə Qorqud” boyları onun, hər şeydən əvvəl, yayıldığı ərazidə türk dilində danışan Azərbaycan xalqının yaşadığını sübut edən möhtəşəm bir dastandır.
Qeyd olunub ki, Naxçıvan Muxtar Respublikası Ali Məclisinin Sədri cənab Vasif Talıbovun 2017-ci il 28 avqust tarixli Sərəncamı ilə təsdiq edilmiş “Oxunması zəruri olan kitabların Siyahısı”nda “Kitabi-Dədə Qorqud” dastanının özünə yer alması bu böyük yazılı abidəyə ehtiramın ifadəsidir.
Tədbirdə məktəbin yuxarı sinif şagirdlərinin ifasında dastandan parçalar bədii qiraət olunub.

Şirin MİRZƏYEVA
Aza kənd tam orta məktəbinin uşaq birliyi təşkilatının rəhbəri