Olimpiadanın keçirilməsinin məqsədi Naxçıvan şəhərinin Gənclər Paytaxtı seçilməsinin qeyd olunması, yeniyetmələrin intellektual fəaliyyətə cəlb edilməsi, onların bilik səviyyələrinin, dünyagörüşlərinin artırılması, asudə vaxtlarının səmərəli təşkil edilməsidir. Yarışlar başlanmazdan əvvəl Naxçıvan Muxtar Respublikası Gənclər və İdman Nazirliyinin şöbə müdiri Tahir Məmmədli və Gənclər Fondunun əməkdaşı Ceyhun Xəlilli çıxış edərək oyunların keçirilmə qaydaları haqqında məlumat veriblər.
Olimpiada “Nuh yurdu”, “Kim? Nə? Hara?”, “Vətəni tanı” intellektual oyunları və “İntellektual gənc” bilik yarışması üzrə vahid turnir şəklində keçirilib.
“İntellektual gənc” bilik yarışmasında ilk üç pillədə Şahbuz şəhər 1 nömrəli tam orta məktəbin şagirdi Elvina Həsənli, Külüs kənd tam orta məktəbinin şagirdi Simar Əliyev və Biçənək kənd tam orta məktəbinin şagirdi Şəbnəm Seyidova qərarlaşıblar.
“Kim? Nə? Hara?” intellektual oyununda isə qalib adını Biçənək kənd tam orta məktəbinin şagirdi Hərgül Hüseynli qazanıb. Şahbuz şəhər 1 nömrəli tam orta məktəbin şagirdi Məryəm Məmmədli ikinci, Aşağı Qışlaq kənd tam orta məktəbinin şagirdi Nisə Rəcəbli üçüncü olublar.
“Vətəni tanı” intellektual oyununda Kükü kənd tam orta məktəbinin “Odlar yurdu” komandası hamıdan güclü olub. Digər iki pillədə Şahbuz şəhər 1 nömrəli tam orta məktəbin “İldırım” və Şahbuz şəhər 2 nömrəli tam orta məktəbin “Qartal” komandaları qərarlaşıblar.
“Nuh yurdu” intellektual oyununda isə Şahbuz şəhər 1 nömrəli tam orta məktəbin “İldırım” komandası rəqiblərini qabaqlayıb. Külüs kənd tam orta məktəbinin “Turan” komandası ikinci, Kolanı kənd tam orta məktəbinin “Zəka” komandası isə üçüncü olub.
Qaliblərə təşkilatçıların diplom, fəxri fərmanları və oxunması zəruri olan kitablar təqdim edilib.
Qeyd edək ki, qalib komandalar Şahbuz rayonunu may ayında təşkil olunacaq “İntellektual oyunlar olmpiadası”nın muxtar respublika birinciliyində təmsil edəcəklər.
Olimpiada Naxçıvan Muxtar Respublikası Gənclər və İdman, Təhsil nazirlikləri, Naxçıvan Muxtar Respublikasının Gənclər Fondu, Yeni Azərbaycan Partiyası Naxçıvan Muxtar Respublika Təşkilatı Heydər Əliyev adına Gənclər Birliyinin və “Gənclərin İntellektual İnkişaf Mərkəzi” İctimai Birliyinin birgə təşkilatçılığı ilə keçirilib.
Ceyhun MƏMMƏDOV
