Aprelin 28-də görkəmli oftalmoloq-alim, akademik Zərifə xanım Əliyevının anadan olmasının 95-ci ildönümü tamam olur. Bu münasibətlə Ukrayna Respublikasının İrpen şəhərində fəaliyyət göstərən Akademik Zərifə xanım Əliyeva adına 12 nömrəli xarici dillər üzrə ixtisaslaşmış ümumtəhsil məktəbinin bir qrup müəllimi Naxçıvan Muxtar Respublikasına gəlib. Məktəbin direktoru Valentina Antonenko, dillər üzrə dərs hissə müdiri Lyudmila Arbuzina, informasiya-kommunikasiya texnologiyaları üzrə müəllim Alla Çumak və Ukrayna Təhsil Nazirliyinin əməkdaşı Oksana Zubenko səfər çərçivəsində muxtar respublikanın gəzməli-görməli yerləri ilə tanış olacaq, Kəngərli rayonunda Akademik Zərifə xanım Əliyeva adına Şahtaxtı kənd tam orta məktəbində görkəmli alimin 95 illiyi münasibətilə keçiriləcək tədbirdə iştirak edəcəklər.
Dünən qonaqlar ilk olaraq xalqımızın ümummilli lideri Heydər Əliyevin Naxçıvan şəhərinin baş meydanında əzəmətlə ucalan abidəsinin önünə gül dəstələri qoymuş, Heydər Əliyev Muzeyi ilə tanış olmuşlar.
Məlumat verilmişdir ki, muxtar respublikamızda yaradılan muzeylər içərisində Heydər Əliyev Muzeyi xüsusi əhəmiyyət kəsb edir. Görkəmli ictimai-siyasi xadim, dünya şöhrətli siyasətçinin muzeylərə sığmayan zəngin ömür yolunu əks etdirən dəyərli ekspozisiyada ümummilli liderimizin siyasi fəaliyyətinin müxtəlif tarixi mərhələlərini əks etdirən zəngin materiallar nümayiş olunur.
Vurğulanmışdır ki, hər il muzeydə ulu öndər Heydər Əliyevin ictimai-siyasi fəaliyyəti ilə bağlı aidiyyəti təşkilatlarla elmi konfranslar, lektoriyalar, açıq dərslər keçirilir, həmçinin muzeyə tələbə və məktəblilərin ekskursiyaları təşkil olunur.
Naxçıvan Dövlət Xalça Muzeyi ilə tanışlıq zamanı ukraynalı qonaqlara Naxçıvan xalçaçılıq ənənələri barədə ətraflı məlumat verilib.
Sonra qonaqlar Heydər Əliyev adına tam orta məktəbdə və Naxçıvan şəhər 3 nömrəli tam orta məktəbdə olmuş, adıçəkilən təhsil ocaqlarının müəllim kollektivləri ilə görüşmüş, tədris şəraiti haqqında məlumatlar almışlar.
Qeyd edək ki, Ukrayna Respublikasının İrpen şəhərində fəaliyyət göstərən Akademik Zərifə xanım Əliyeva adına 12 nömrəli xarici dillər üzrə ixtisaslaşmış ümumtəhsil məktəbinin müəllimlərinin muxtar respublikaya səfəri davam edir.
Səbuhi HƏSƏNOV
