Dövlət İmtahan Mərkəzi aprelin 1-də rezidenturaya qəbul imtahanının birinci mərhələsini keçirib. İmtahan Bakı şəhərində 3, Naxçıvan şəhərində isə 1 binada baş tutub. Bütün binalarda eyni vaxtda – saat 1100-da başlayıb 2 saat 30 dəqiqə davam edən imtahanın idarə olunmasına 11 imtahan rəhbəri və 98 nəzarətçi-müəllim cəlb olunub.
Dövlət İmtahan Mərkəzinin Naxçıvan Muxtar Respublikası Regional Bölməsinin təşkilatçılığı ilə Naxçıvan şəhərində imtahan Naxçıvan Dövlət Universitetinin Sosial idarəetmə və hüquq fakültəsinin binasında keçirilib. 53 namizədin iştirak etdiyi imtahana 1 imtahan rəhbəri, 6 nəzarətçi-müəllim cəlb edilib ki, nəzarətçilər Dövlət İmtahan Mərkəzinin Naxçıvan Muxtar Respublikası Regional Bölməsinin bazasındandır.
Həmin gün, eyni zamanda ali məktəblərə hazırlaşan abituriyentlər üçün cari ilin ilk sınaq imtahanı da keçirilib. İmtahan Naxçıvan şəhər 14 nömrəli tam orta məktəbdə baş tutub. Saat 1100-da başlayan sınaq imtahanında abituriyentlərə 5 fəndən 125 sual təqdim olunub. Sualların cavablandırılması üçün onlara 3 saat vaxt verilib.
695 abituriyentin iştirak etdiyi imtahana 5 imtahan rəhbəri, 33 nəzarətçi-müəllim cəlb edilib ki, nəzarətçilərin hamısı və 4 imtahan rəhbəri Dövlət İmtahan Mərkəzinin Naxçıvan Muxtar Respublikası Regional Bölməsinin bazasındandır.
Qeyd edək ki, ali məktəblərə hazırlaşan abituriyentlər üçün növbəti sınaq imtahanı aprelin 15-də keçiriləcək. İmtahana qeydiyyat aprel ayının 10-da başa çatacaq.
Hər iki imtahanın nəticələri imtahandan bir neçə gün sonra Dövlət İmtahan Mərkəzinin saytında (www.dim.gov.az) yerləşdiriləcək.
Fatma BABAYEVA
