Naxçıvan Dövlət Universitetində Azərbaycan xalqının ümummilli lideri Heydər Əliyevin 90 illik yubileyi münasibətilə respublika ali təhsil müəssisələrinin tələbələri arasında keçirilən musiqi ifaçılarının müsabiqəsində qazanılan “Qran-pri” mükafatının təqdimetmə mərasimi keçirilib. Mərasimi giriş sözü ilə açan universitetin rektoru, biologiya elmləri doktoru Saleh Məhərrəmov Azərbaycan xalqının ümummilli lideri Heydər Əliyevin 90 illik yubileyi, 2013-cü ilin Naxçıvan Muxtar Respublikasında “Heydər Əliyev ili” elan olunması ilə əlaqədar universitetdə keçirilən tədbirlərdən danışıb. Rektor muxtar respublika rəhbərinin diqqət və qayğısı sayəsində Naxçıvan Dövlət Universitetində müxtəlif sahələrin, eləcə də incəsənətin inkişafı istiqamətində mühüm uğurlar qazanıldığını vurğulayıb. Qeyd olunub ki, Azərbaycan Respublikası Təhsil Nazirliyi və Azərbaycan Dövlət Mədəniyyət və İncəsənət Universitetinin təşkilatçılığı ilə keçirilən müsabiqədə Naxçıvan Dövlət Universiteti “Qran-pri” mükafatı qazanıb. Rektor müsabiqə qaliblərini təbrik edərək muxtar respublika mədəniyyətinin, incəsənətinin təbliğində onlara müvəffəqiyyətlər arzulayıb.
Vokal qrupunun bədii rəhbəri, NDU-nun Orkestr alətləri və dirijorluq kafedrasının müdiri, Naxçıvan Muxtar Respublikasının əməkdar artisti Validə Hüseynova çıxış edərək müsabiqənin ali təhsil ocaqlarında ifaçılıq sənətini inkişaf etdirmək, Azərbaycan ifaçılıq sənətinin təbliği, gənc istedadların üzə çıxarılması baxımından əhəmiyyətindən danışıb. Bildirilib ki, müsabiqə vokal, xanəndə, estrada, xalq çalğı alətləri, fortepiano və aşıq sənəti nominasiyaları olmaqla, 6 ixtisas üzrə keçirilib. İki turdan ibarət müsabiqədə 130-dan çox tələbə öz bilik və bacarıqlarını nümayiş etdirib. Azərbaycanın bütün ali təhsil müəssisələri ilə yanaşı, qardaş Türkiyə Cümhuriyyətindən, Ukrayna Respublikasından, İran İslam Respublikasından da nümayəndələr müsabiqəyə qatılıb. “Estrada və populyar musiqi” nominasiyası üzrə Naxçıvan Dövlət Universitetinin koreyalı, nigeriyalı, banqladeşli tələbələrdən ibarət “Meridian” vokal qrupunun ifaları elə ilk turdan böyük maraqla qarşılanıb. Azərbaycan musiqi sənətinin görkəmli nümayəndələri, Azərbaycan Dövlət Mədəniyyət və İncəsənət Universitetinin professor və müəllim heyətindən ibarət münsiflər heyəti çıxışı yüksək qiymətləndirib. Qeyri-musiqiçilərdən ibarət, xarici tələbələrin də təmsil olunduğu “Meridian” vokal qrupunun 5 səsli vokal ifaları müsabiqənin ən böyük mükafatına – “Qran-pri” mükafatına layiq görülüb.
Universitetin tərbiyə işləri üzrə prorektoru, fəlsəfə elmləri doktoru, professor Məmməd Rzayev mədəniyyətin, incəsənətin inkişafına göstərilən dövlət qayğısından danışaraq “Qran-pri” qaliblərini kollektiv adından təbrik edib.
Tədbirdə müsabiqənin gedişini əks etdirən videoçarx nümayiş etdirilib.
Mehriban SULTAN
