Naxçıvan şəhərindəki 14 nömrəli tam orta məktəbdə Naxçıvan Muxtar Respublikası fənn olimpiadasının final mərhələsi keçirilib.
Ümumilikdə, altı fənn üzrə keçirilən olimpiada səhər saat 1000-dan 1200-dək davam edib. Şagirdlər riyaziyyat, fizika, kimya, biologiya, Azərbaycan dili, xarici dil fənnləri üzrə 30 açıq test sualını cavablandırıblar.
Olimpiada iştirakçısı olan Culfa rayonunun Milax kənd tam orta məktəbinin 11-ci sinif şagirdi Rüqəyya Zeynalova ilə söhbətimizdə o qeyd etdi ki, Culfa şəhərində keçirilən olimpiadanın 1-ci mərhələsində iştirak etdim: “Yüksək nəticə göstərdiyimə görə, bu gün final mərhələsində iştirak etmək imkanı qazanmışdım. Olimpiadanın məqsədi şagirdlərin bilik və qabiliyyətini üzə çıxarmaqdır. Mən də çalışdım ki, məktəbimizin adını layiqincə təmsil edəm. Sualları düzgün cavablandırdığıma əminəm. İnanıram ki, qaliblər sırasında olacağam”. Şərur şəhərindəki Fizika-Riyaziyyat Təmayüllü Liseyin 10-cu sinif şagirdi İbrahim Qasımov da uğur qazanacağına əmindir. Sualları cavablandırmaq onun üçün də o qədər çətin olmayıb.
Qeyd edək ki, Naxçıvan Muxtar Respublikası Təhsil Nazirliyinin təşkilatçılığı ilə 1026 şagirdin iştirakı ilə keçirilən olimpiadanın birinci mərhələsində yüksək nəticələr göstərən şagirdlər muxtar respublika turunda iştirak etmək hüququ qazanıblar.
Naxcivantv.az
