Muxtar respublikamızda təhsil sahəsində əldə olunan uğurlar ilbəil artır. Ölkəmizin sürətli inkişafı, təhsilə göstərilən dövlət qayğısı gənclərin elm, təhsil yollarında uğurla addımlaması, gələcək cəmiyyət quruculuğunda Azərbaycanın daha da qüdrətli olması yolunda hər bir imkan yaradıb.
Şahbuz rayonunda istifadəyə verilən yeni təhsil ocaqları, yeniləşən təhsil infrastrukturu məntiqi olaraq özünü ali məktəblərə qəbul olunan gənclərin sayının artmasına, onların yüksək nəticələr göstərməsinə imkan yaradır. Cari ildə başa çatmış ali məktəblərə qəbul kampaniyasının nəticələrinə əsasən onu deyə bilərik ki, bu il də Şahbuz rayonunda qəbul nəticələri sevindiricidir.
Şahbuz tarixən tanınmış ziyalıların doğulub boya-başa çatdığı yer olub. Bu ənənə indi də davam etdirilir. Hər il Şahbuzda təhsil alan şagirdlərin yüksək ballarla ali məktəblərə qəbul olması bu fikri bir daha təsdiq edir. Ali məktəblərə builki qəbulda Şahbuz rayonu üzrə 136 nəfər sənəd verərək, 83 nəfər tələbə adını qazanıb. Onlar arasında yüksək nəticələr göstərənlər də çoxdur. Belə ki, məzunlardan 21 nəfəri 500 baldan yuxarı, 9 nəfəri isə 600 baldan yuxarı nəticələr göstərib. Bu da onların ailələrini və müəllimlərini xeyli sevindirib.
Səfa Rzayeva qəbul imtahanlarında 672 bal toplayıb. Bu, cari ildə Şahbuz rayonu üzrə ən yüksək nəticədir. O, Kükü kənd tam orta məktəbinin məzunudur. Məktəbi qızıl medalla bitirib. Naxçıvan Dövlət Universitetinin Hüquq fakültəsinə daxil olub. Səfa sadə kəndli ailəsində böyüyüb. Valideynləri təsərrüfatla məşğul olurlar. Onunla söhbətdə bildirir ki, ən böyük arzusu qanun keşikçisi kimi cəmiyyətimizə faydalı olmaqdır. İlk arzusuna çatıb. Amma qarşıda daha məsuliyyətli bir dövr vardır. Tələbə adını qazanmaqla iş bitmir. Daha çox oxumalı, öz üzərində işləməli, ən azı iki xarici dil öyrənməlidir. Qazandığı bu uğurlara görə dövlətimizə çox minnətdardır. Çalışacaq ki, valideynlərini, ona dərs demiş müəllimləri bundan sonra da sevindirsin.
Xəyalə Fətəlixanlı Yuxarı Qışlaq kənd tam orta məktəbini bitirib. 671 balla Naxçıvan Dövlət Universitetinin Tibb fakültəsinə daxil olub. Dediyinə görə, hələ kiçik yaşlarından həkim olmaq istəyib. Gələcəkdə universiteti bitirib, doğma kəndində həkim kimi çalışmaq istəyir. Xəyalə qazandığı uğurlara görə ibtidai sinifdən məktəbi bitirənə qədər ona dərs demiş bütün müəllimlərə çox minnətdardır. Yaxşı həkim necə olmalıdır? – soruşduqda Xəyalə deyir ki, bunun üçün, ilk növbədə, vətənpərvər olmalı, insanların sağlamlığının keşiyində durmalıyam. Bu isə çox məsuliyyətlidir. Çünki ölkəmizdə insan amilinə, sağlamlığa çox ciddi diqqət yetirilir. Bunun üçün də yaxşı həkimlərə həmişə ehtiyac vardır.
Digər bir həmsöhbətim Dilarə Şahgəldiyeva isə Şahbuz şəhərindəndir. Buradakı bir nömrəli tam orta məktəbi bitirib. 650 balla Naxçıvan Dövlət Universitetinin İngilis dili müəllimliyi ixtisasına daxil olub. Dilarə deyir ki, dil öyrənməyi çox sevir: bilirəm ki, inkişaf edən ölkəmizin, muxtar respublikamızın xarici ölkələrlə yaxın əlaqələri vardır. İngilis dili də beynəlxalq dildir. Hara getsən, hansı ölkəyə səyahət etsən, orada ingilis dili işlənir. Dilarə onu da qeyd edir ki, istənilən xarici dili öyrənmək üçün ana dilimizi yaxşı bilməliyik. Bunun üçün Azərbaycan dilinin bütün incəliklərinə yaxşı bələd olmaqla ingilis dilini daha dərindən öyrənməyə və gələcəkdə bu sahə üzrə yaxşı mütəxəssis olmağa çalışacağam. Qloballaşma dövründə yaşayırıqsa, bizim də bu karvana layiqlə qoşulmağımız tələb olunur.
“Təhsil olmadan gələcək haqqında düşünmək mümkün deyil”. Bu il avqustun 22-də Naxçıvan Muxtar Respublikasının ümumtəhsil məktəblərini bitirərək ali məktəblərə qəbul imtahanlarında yüksək bal toplamış tələbələrlə görüşdə Ali Məclis Sədrinin bu fikirlərində gələcəyə doğru dərin inam var. Çünki Naxçıvanda sağlam təhsil üçün hər bir şərait yaradılıb. Bu nikbinlik yaşıdlarından bir addım öndə olan şahbuzlu tələbələrlə söhbətdə bir daha möhkəmləndi. Gələcəkdə onlara harada yaşamalarından, hansı vəzifədə çalışmalarından asılı olmayaraq, əsl azərbaycanlı kimi yaşamaq və işləmək arzulayırıq. Yolunuz açıq olsun!
Əli Cabbarov
