Azərbaycan Respublikasının Prezidenti cənab İlham Əliyev demişdir: “İnsanın yaxşı həyatını təmin edən amillərdən biri də ekoloji vəziyyət, sağlamlıq və təbiətin, ətraf mühitin qorunmasıdır”.
Xalqımız tarixən təbiətin, ətraf mühitin qorunması qayğısına qalmış, baharın gəlişini səliqə-sahman yaratmaqla, yaşıllıqlar salmaqla qarşılamışdır. İşgüzarlıq, təbiətə qayğı və torpağa bağlılıqdan qaynaqlanan bu xeyirxah əməllər bu gün də yaşadılır.

Martın 5-də Naxçıvan Muxtar Respublikasında iməciliklər keçirilmiş, təmizlik-abadlıq işləri görülmüş, yeni yaşıllıq zolaqları və meyvə bağları salınmışdır.
Naxçıvan Muxtar Respublikası Ali Məclisinin, Nazirlər Kabinetinin, Naxçıvan Muxtar Respublikası Ekologiya və Təbii Sərvətlər Nazirliyinin kollektivləri Naxçıvan-Sədərək avtomobil yolunun kənarındakı püstə bağında, eləcə də Təzəkənd-Çalxanqala-Qıvraq dairəvi avtomobil yolunun ətrafında keçirilən iməcilikdə iştirak etmişlər.
Uzunoba Su Anbarından yeni su xəttinin çəkilməsi və Kəngərli rayonu ərazisində suvarma şəbəkəsinin qurulması uzun müddət əkilməyən bu torpaqları yenidən əkin dövriyyəsinə qatmışdır. Püstə bağı üçün 100 hektar ərazi ayrılmış, meliorativ tədbirlər görülmüş, ötən ilin payızında iməciliklər yolu ilə 50 hektarda 20 minə yaxın püstə tingi əkilmişdir. Bu il əlavə 50 hektar ərazidə püstə tingləri əkiləcək, damcılı suvarma sistemi qurulacaqdır. İməcilik iştirakçıları ərazidə 1000 ədəd püstə tingi əkmiş, ötən il salınan püstə bağına aqrotexniki qulluq göstərmişlər.
Naxçıvan Muxtar Respublikası Ali Məclisinin Sədri Vasif Talıbov iməcilikdə iştirak etmiş, püstə bağında yeni tinglər əkmişdir. Ali Məclisin Sədri püstə bağında əkin işlərinin davam etdirilməsi və bağın ətrafında qoruyucu yaşıllıq zolağının salınması barədə tapşırıqlar vermişdir.
Həmin gün muxtar respublika ərazisində iməciliklər yolu ilə 23 minə yaxın ting və 18 mindən artıq bəzək kolları əkilmişdir.

Naxçıvan Muxtar Respublikası
Ali Məclisinin mətbuat xidməti