Muxtar respublika sakinləri 2016-cı ilin ilk günlərini böyük sevinc hissi ilə qarşılayır. İnsanlar əmindir ki, ölkəmizin davamlı inkişaf və tərəqqisi bu il də bütün sahələrdə nailiyyətlərin qazanılmasına imkan verəcəkdir.

Yanvarın 1-də ölkəmizin hər yerində olduğu kimi, Naxçıvan Muxtar Respublikasının şəhər və rayon mərkəzlərində də bayram şənlikləri keçirilmişdir.
Naxçıvan şəhərinin sakinləri ümummilli liderimiz Heydər Əliyevin adını daşıyan prospektdəki mərkəzi meydanda təşkil olunan bayram şənliyinə toplaşmışdı. Yeni ilin gəlişini tərənnüm edən mahnıların səslənməsi, Naxçıvan Dövlət Kukla Teatrının aktyorlarının göstərdikləri səhnəciklər şənliyə gələnlərdə əsl bayram əhval-ruhiyyəsi yaratmışdır.
Mərkəzi meydanda 40-dan artıq istehsal və xidmət müəssisəsi tərəfindən ictimai-iaşə xidməti göstərilmiş, sənətkarların əl işlərindən ibarət sərgi təşkil olunmuşdur.
Naxçıvan Muxtar Respublikası Ali Məclisinin Sədri Vasif Talıbov bayram şənliyinin keçirildiyi mərkəzi meydana gəlmiş, sakinlərin Yeni il bayramını təbrik etmişdir.
Ali Məclisin Sədri ictimai-iaşə xidmətinin təşkili ilə maraqlanmış, uşaqlara hədiyyələr vermişdir.
Muxtar respublikada yeni il şənlikləri bayram günlərində davam edəcəkdir.

Naxçıvan Muxtar Respublikası
Ali Məclisinin mətbuat xidməti