Mayın 12-də Naxçıvan Muxtar Respublika Stadionunda “Araz-Naxçıvan” komandasının futbol üzrə Azərbaycan çempionatının birinci divizionda qalib olması və Premyer-Liqaya vəsiqə qazanması münasibətilə mükafatlandırma mərasimi keçirilmişdir.
Tədbirin aparıcıları qeyd etmişlər ki, ümummilli liderimiz Heydər Əliyev tərəfindən əsası qoyulan idman siyasəti Azərbaycan Respublikasının Prezidenti cənab İlham Əliyev tərəfindən uğurla davam etdirilir. “Azərbaycan Respublikasında 2005-2015-ci illərdə futbolun inkişafına dair Dövlət Proqramı”na uyğun olaraq yeni futbol meydançaları, stadionlar tikilir, futbol komandaları yaradılır. Futbolun inkişafına göstərilən qayğı ölkəmizin bütün bölgələrində bu idman növünün geniş yayılmasına və kütləvi xarakter almasına səbəb olmuşdur. Naxçıvan Muxtar Respublikasında da futbolun inkişafına xüsusi diqqət yetirilir. 2013-cü ildə Naxçıvan Muxtar Respublikası Ali Məclisində “Bədən tərbiyəsi və idmanın hazırkı vəziyyəti və qarşıda duran vəzifələr”lə bağlı keçirilmiş müşavirədə Ali Məclisin Sədri tərəfindən futbolun inkişafı istiqamətində konkret vəzifələr müəyyənləşdirilmiş, “Araz-Naxçıvan” futbol komandasının yenidən formalaşdırılması barədə tapşırıqlar verilmişdir.

Bundan sonra “Araz-Naxçıvan” böyük futbola qayıtmış və futbol üzrə Azərbaycan çempionatının birinci divizionunun 2013-2014-cü il mövsümündə iştirak etmişdir. Birinci divizionun başa çatmasına hələ 2 tur qalmış çempionluğunu elan edən muxtar respublika təmsilçisi yüksək nəticə əldə etmişdir. Bu qələbə Naxçıvan Muxtar Respublikasının 90 illik yubileyinə ən böyük töhfədir.

Sonra konsert proqramı olmuşdur. Müğənnilərdən Şəmistan Əlizamanlının, Vəli Səfərovun, Türkanə Kərimovanın, Rza Zamanın və Xuraman Ələsgərovanın çıxışları stadiona toplaşmış minlərlə tamaşaçı tərəfindən alqışlarla qarşılanmışdır.
Daha sonra “Araz-Naxçıvan” komandası ilə Mingəçevir şəhərini təmsil edən “Energetik” komandası arasında birinci divizionun növbəti turunun oyunu keçirilmişdir. Əzmkar mübarizə aparan “Araz-Naxçıvan” komandası 9:0 hesabı ilə qələbə qazanmışdır.
Oyundan sonra təntənəli mükafatlandırma mərasimi olmuşdur.
Naxçıvan Muxtar Respublikası Ali Məclisinin Sədri Vasif Talıbov “Araz-Naxçıvan” komandasının üzvlərinə medalları və kuboku təqdim etmiş, futbolçulara təbriklərini çatdırmışdır.
Azərbaycan Peşəkar Futbol Liqasının prezidenti Ramin Musayev futbolun inkişafına göstərdiyi qayğıya görə Ali Məclisin Sədrinə Peşəkar Futbol Liqasının xatirə medalını təqdim etmişdir.
Sonra Ali Məclisin Sədri “Araz-Naxçıvan” komandasının üzvləri ilə xatirə şəkli çəkdirmiş, çempionluq tortunu kəsmişdir.

Naxçıvan Muxtar Respublikası
Ali Məclisinin mətbuat xidməti