Muxtar respublika sakinləri yeni ili xoş arzular, yüksək əhval-ruhiyyə ilə qarşılamışlar.
Yanvarın 1-də ölkəmizin hər yerində olduğu kimi, muxtar respublikamızın şəhər və rayon mərkəzlərində də bayram şənliyi keçirilmişdir.
Yeni ilin ilk günündə Naxçıvan şəhərinin əhalisi ümummilli liderimiz Heydər Əliyevin adını daşıyan prospektdəki mərkəzi meydanda keçirilən bayram şənliyinə toplaşmışdı. Şənlikdə Vətənimizi, yeni ilin gəlişini tərənnüm edən mahnıların səslənməsi, yolka ətrafında Şaxta babanın, Qar qızın çıxışları, Naxçıvan Dövlət Kukla Teatrının aktyorlarının ifasında səhnəciklərin göstərilməsi şənliyə gələnlərdə xoş ovqat yaratmış, paylanan hədiyyələr balacalara əsl bayram sevinci bəxş etmişdir.
Mərkəzi meydanın bir hissəsində 50-dən artıq istehsal və xidmət müəssisəsi tərəfindən şəhər sakinlərinə ictimai-iaşə xidməti göstərilmişdir.
Naxçıvan Muxtar Respublikası Ali Məclisinin Sədri Vasif Talıbov bayram şənliyinin keçirildiyi mərkəzi meydana gəlmiş, şəhər sakinlərinin Yeni il bayramını təbrik etmiş, onlara 2013-cü ildə cansağlığı və xoş günlər arzulamışdır.
Ali Məclisin Sədri ictimai-iaşə xidmətinin təşkili ilə maraqlanmış, uşaqlara hədiyyələr vermişdir.
Şənlik bayram günlərində davam edəcəkdir.

Naxçıvan Muxtar Respublikası
Ali Məclisinin mətbuat xidməti