İyulun 4-də Naxçıvan Muxtar Respublikası Ali Məclisinin Sədri Vasif Talıbov şahmat üzrə məktəblilər arasında Avropa çempionu, Naxçıvan Şahmat Mərkəzinin yetirməsi Rauf Murtuzovla görüşmüşdür.
Naxçıvan Muxtar Respublikası Şahmat Federasiyasının sədri Vüqar Səfərov məlumat verərək demişdir ki, Rauf Murtuzov 2010-cu ildən etibarən şahmat idman növü ilə məşğul olur. İstedadlı şahmatçı bu günə qədər ölkə və beynəlxalq əhəmiyyətli yarışlarda iştirak edərək uğurlu nəticələr qazanmışdır. Rauf Murtuzov bu il iyunun 20-dən 28-dək Serbiya Respublikasının Novi Sad şəhərində keçirilən məktəblilər arasında Avropa çempionatında birinci yerə layiq görülmüşdür. Şahmatçı qazandığı bu nailiyyətlə beynəlxalq reytinq xalını 2032-ə çatdıraraq muxtar respublika şahmatçıları arasında üçüncü sıraya yüksəlmişdir.
Ali Məclisin Sədri Rauf Murtuzovu məktəblilər arasında Avropa çempionatında birinci yerə layiq görülməsi münasibətilə təbrik edərək demişdir: “Muxtar respublikamızda şahmatın inkişafına xüsusi qayğı göstərilir, bu istiqamətdə ardıcıl tədbirlər həyata keçirilir. Bu gün Naxçıvan şəhərində Şahmat Mərkəzi, rayonlarda şahmat məktəbləri fəaliyyət göstərir. Yaradılan şərait, şahmatın inkişafına göstərilən qayğı gənclərin bu idman növünə olan marağının artmasına, istedadlı şahmatçıların yetişməsinə və beynəlxalq yarışlarda uğurlu nəticələrin qazanılmasına imkan verir. Bu gün muxtar respublikada 3 mindən artıq məktəbli şahmatın sirlərini öyrənir. Eyni zamanda ümumtəhsil məktəblərində şahmat dərsləri tədris olunur. Bu da gənclərin əqli inkişafına, onların dəqiq elmlərə olan marağının artmasına səbəb olmuşdur”.
İstedadlı şahmatçıların üzə çıxarılmasının, rayon şahmat məktəblərində ustad müəllimlərin iştirakı ilə dərslərin keçilməsinin vacibliyini qeyd edən Ali Məclisin Sədri bundan sonra da muxtar respublikada şahmatın inkişafına hərtərəfli diqqət və qayğı göstəriləcəyini bildirmiş, Avropa çempionatında birinci yerə layiq görüldüyünə görə gənc şahmatçı Rauf Murtuzova, onun məşqçisi Talıb Babayevə təşəkkür etmiş və mükafatlandırmışdır.
İstedadlı şahmatçı Rauf Murtuzov və məşqiçi Talıb Babayev şahmatın inkişafına və şahmatçılara göstərilən qayğıya görə minnətdarlıqlarını bildirmişlər.
Naxçıvan Muxtar Respublikası
Ali Məclisinin mətbuat xidməti
