İsti yay günlərində muxtar respublika əhalisinin istirahətinin səmərəli təşkili və sağlamlığının qorunması diqqət mərkəzin­də saxlanılır, mövcud təbii imkanlardan geniş istifadə edilir. Bu məqsədlə su anbarların­­da yaradılan çimərliklər xüsusi əhəmiyyət daşıyır.
İyunun 29-da Naxçıvan Muxtar Respublikası Ali Məclisinin Sədri Vasif Talıbov Uzunoba Su Anbarındakı çimərlik zonasına gəlmiş, burada yaradılan şəraitlə tanış olmuşdur.

Naxçıvan Muxtar Respublikasının fövqəladə hallar naziri, general-mayor Şamı Abdullayev məlumat vermişdir ki, çimərlik zonasının ərazisi 1,5 hektardır. Qumlu sahil xəttinin uzunluğu 550, eni isə 60 metrdir. Böyüklər və uşaqlar üçün nəzərdə tutulan çimərlik iki hissədən ibarətdir. Böyüklərin istirahəti üçün ayrılan sahənin su hissəsinin dərinliyi 4, eni isə 50 metrdir. Suyun üzərində çimərlik sərhədinin qurtardığını bildirən qadağanedici nişanlar qoyulmuşdur.

Çimərlik ərazisində insanların istirahət etməsi üçün lazımi şərait yaradılmışdır. Əraziyə günlüklər qoyulmuş, paltardəyişmə yerləri, futbol və voleybol meydançaları, eləcə də avtomobil dayanacağı yaradılmış, ictimai-iaşə xidməti təşkil olunmuşdur. Həmçinin burada su idman növləri ilə məşğul olmaq üçün də lazımi şərait vardır.
Naxçıvan Muxtar Respublikası Fövqəla­də Hallar Nazirliyinin Dövlət Sularda Xi­lasetmə Xidmətinin şəxsi heyəti əyani şəkil­də axtarış-xilasetmə tədbirlərini nümayiş etdirmişdir.
Qeyd olunmuşdur ki, çimərlikdə insanların təhlükəsizliyi və sağlamlığı da nəzərə alınmışdır. Burada 2 müşahidə qülləsi, ilkin tibbi yardım məntəqəsi yaradılmış, xəbərdaredici və məlumatlandırıcı lövhələr vurulmuşdur. Naxçıvan Muxtar Respublikası Fövqəladə Hallar Nazirliyinin dalğıc geyimləri və ləvazimatları ilə təchiz olunmuş xilasedici qrupu ərazidə xidmət göstərir.
Ali Məclisin Sədri mövsüm ərzində aidiy­yəti qurumlar tərəfindən çimərlikdə suyun təmizliyinin nəzarətdə saxlanılması və təhlükəsizlik qaydalarına əməl edilməsi barədə tapşırıqlar vermişdir.

Naxçıvan Muxtar Respublikası
Ali Məclisinin mətbuat xidməti