"2016-2020-ci illərdə Naxçıvan Muxtar Respublikasında meyvəçiliyin və tərəvəzçiliyin inkişafı üzrə Dövlət Proqramı" uğurla icra olunur. Hər il ənənəvi və məhsuldar meyvə sortlarından ibarət yeni bağlar salınır. Badamçılıq da Naxçıvanda qədim meyvəçilik sahələrindədir. İqlim şəraiti və torpaq xüsusiyyətləri muxtar respublikada badamçılığın inkişafına və bu sahə üzrə məhsul istehsalının artırılmasına imkan verir. 

Noyabrın 4-də muxtar respublikada növbəti iməcilik keçirilmiş, Naxçıvan-Sədərək avtomobil yolunun kənarında - Kəngərli rayonunun Xok kəndi ərazisində yeni badam bağı salınmışdır. 

Naxçıvan Muxtar Respublikası Ali Məclisinin, Nazirlər Kabinetinin, Ekologiya və Təbii Sərvətlər Nazirliyinin, Kəngərli Rayon İcra Hakimiyyətinin kollektivləri badam bağı salınan ərazidə keçirilən iməcilikdə iştirak etmişlər. 

 Badam bağının sahəsi 6 hektardır. Ərazidə meliorativ və aqrotexniki tədbirlər görülmüş, torpaq əkinəyararlı hala salınmışdır. İməcilik iştirakçıları ərazidə 3 mindən artıq yerli badam tingi əkmişlər. Ötən il ərazidə qapalı suvarma şəbəkəsinin istifadəyə verilməsi badam bağının dayanıqlı su təminatına da imkan verəcəkdir. 

Naxçıvan Muxtar Respublikası Ali Məclisinin Sədri Vasif Talıbov iməcilikdə iştirak etmiş, payız iməcilikləri dövründə yeni meyvə bağlarının salınması barədə tapşırıqlar vermişdir. 

Naxçıvan Muxtar Respublikası
Ali Məclisinin mətbuat xidməti