Yanvarın 5-də Tumbulda yeni kənd mərkəzi istifadəyə verilmişdir.
Naxçıvan Muxtar Respublikası Ali Məclisinin Sədri Vasif Talıbov açılışı bildirən lenti kəsmişdir.

Məlumat verilmişdir ki, binada rabitə evi, inzibati ərazi dairəsi üzrə nümayəndəlik, bələdiyyə, polis sahə məntəqəsi, baytarlıq məntəqəsi, statistika otağı, feldşer-mama məntəqəsi, fondunda 4900 ədəbiyyat olan kitabxana, Yeni Azərbaycan Partiyası ərazi ilk təşkilatı və 44 yerlik iclas zalı vardır. Kənddə müasir rabitə sistemi yaradılmış, fiber-optik xətt çəkilmiş, 512 yerlik ATS quraşdırılmış və poçt bölməsi fəaliyyətə başlamışdır. Tumbulda 83 internet istifadəçisi vardır.
Tumbul kəndində 2003 nəfər əhali yaşayır. Onlardan 407-si dövlət büdcəsindən əməkhaqqı, pensiya və müavinət alır. Kənd inzibati ərazi dairəsi üzrə nümayəndəlik və bələdiyyə üçün ayrılan müasir iş otaqlarında sakinlərə nümunəvi xidmət göstəriləcəkdir.
Feldşer-mama məntəqəsi üçün 4 otaq ayrılmış, ilkin tibbi xidmətin təşkili təmin edilmişdir. Bildirilmişdir ki, hazırda 36 hamilə qadın məntəqədə qeydiyyatdadır. Hamilə qadınlara vaxtlı-vaxtında patronaj xidməti göstərilir, yeni doğulmuş uşaqlara peyvənd vurulur.
Ali Məclisin Sədri kənd mərkəzindəki dövlət qurumlarının fəaliyyəti ilə maraqlanmış, müvafiq tapşırıq və tövsiyələrini vermişdir.

Naxçıvan Muxtar Respublikası
Ali Məclisinin mətbuat xidməti