İran İslam Respublikasının rabitə və informasiya texnologiyaları naziri, İran-Azərbaycan hökumətlərarası iqtisadi əməkdaşlıq komissiyasının həmsədri Mahmud Vaezinin rəhbərlik etdiyi nümayəndə heyəti muxtar respublikaya səfərə gəlmişdir.
Dekabrın 29-da Naxçıvan Muxtar Respublikası Ali Məclisinin Sədri Vasif Talıbov İran İslam Respublikasının rabitə və informasiya texnologiyaları naziri Mahmud Vaezi və onun rəhbərlik etdiyi nümayəndə heyəti ilə görüşmüşdür.
Ali Məclisin Sədri qonaqları salamlamış, Mahmud Vaezini muxtar respublikada görməkdən məmnunluğunu bildirərək demişdir: Azərbaycanın ayrılmaz tərkib hissəsi olan Naxçıvan Muxtar Respublikası ilə İran İslam Respublikası arasında əlaqələrin əsası ötən əsrin 70-ci illərində qurulmuşdur. Həmin dövrdə hər iki tərəfdən Araz çayı üzərində 22 meqavat gücündə su elektrik stansiyası tikilərək istifadəyə verilmişdir. Ümummilli liderimiz Heydər Əliyevin 1992-ci ilin avqust ayında Naxçıvan Muxtar Respublikası Ali Məclisinin Sədri kimi İran İslam Respublikasına səfərindən sonra isə əlaqələrin inkişafında yeni mərhələnin əsası qoyulmuşdur. Ulu öndər ölkəmizə rəhbərliyi dövründə İranla əlaqələrin inkişafı sahəsində mühüm tədbirlər həyata keçirmişdir. Bu gün də Azərbaycan-İran əlaqələri hər iki ölkə Prezidenti tərəfindən uğurla davam etdirilir. Bu əlaqələr hər iki tərəf üçün faydalıdır. Azərbaycan-İran hökumətlərarası iqtisadi əməkdaşlıq komissiyası da əlaqələrin inkişafına töhfə verir. Bu gün Naxçıvanda komissiyanın yekun iclas keçirməsi və protokolun imzalanması mühüm əhəmiyyətə malikdir.

Ali Məclisin Sədri demişdir ki, Azərbaycanın Naxçıvan Muxtar Respublikası ilə İranın yaxın vilayətləri arasında elm, təhsil, energetika və iqtisadi-ticarət sahələrində əlaqələr inkişaf etdirilir, gömrük-keçid məntəqələri səmərəli fəaliyyət göstərirlər. Bu ilin ötən dövründə 450 minə yaxın insan Naxçıvandan İrana və İrandan Naxçıvana gəlmişdir. Naxçıvan-Təbriz-Tehran-Məşhəd sərnişin qatarının istifadəyə verilməsi də hər iki tərəfdən gediş-gəlişin artmasına səbəb olacaqdır.
Ali Məclisin Sədri əlaqələrin inkişafında xidmətləri olanlara təşəkkürünü bildirmişdir.
İran İslam Respublikasının rabitə və informasiya texnologiyaları naziri Mahmud Vaezi Naxçıvanda 18 il bundan əvvəl olduğunu bildirmiş, ötən əsrin 90-cı illərində Azərbaycan xalqının ümummilli lideri Heydər Əliyevlə muxtar respublikada görüşlərini xatırlatmış, son illər Naxçıvanda əldə olunan inkişafın məmnunluq doğurduğunu qeyd etmişdir. Bildirilmişdir ki, İran İslam Respublikası Azərbaycan və onun Naxçıvan Muxtar Respublikası ilə əlaqələrin inkişafına mühüm əhəmiyyət verir. Azərbaycan-İran hökumətlərarası iqtisadi əməkdaşlıq komissiyasının yekun iclasının və Azərbaycan-İran Biznes Forumunun Naxçıvanda keçirilməsi, Naxçıvan-Təbriz-Tehran-Məşhəd sərnişin qatarının fəaliyyətə başlaması ikitərəfli əlaqələrin inkişafı baxımından mühüm əhəmiyyətə malikdir. İqtisadi-ticarət, kənd təsərrüfatı, səhiyyə və digər sahələrdə həyata keçirilən birgə tədbirlər gələcək əməkdaşlıq üçün şərait yaradır.
Mahmud Vaezi nümayəndə heyətinə göstərilən diqqətə görə minnətdarlıq etmişdir.
Sonra hədiyyələr təqdim olunmuşdur.
Azərbaycan Respublikasının iqtisadiyyat naziri Şahin Mustafayev və “Azərbaycan Dəmir Yolları” Qapalı Səhmdar Cəmiyyətinin sədri Cavid Qurbanov görüşdə iştirak etmişlər.

Naxçıvan Muxtar Respublikası
Ali Məclisinin mətbuat xidməti