Muxtar respublikanın iqlim şəraitinə uyğun kənd təsərrüfatı bitkilərinin müəyyənləşdirilməsi və bitki ehtiyatlarının zənginləşdirilməsi diqqət mərkəzində saxlanılır. Azərbaycan Milli Elmlər Akademiyasının Naxçıvan Bölməsinin Nəbatat bağında bitkilərin biomüxtəlifliyinin öyrənilməsi və toxum genofondunun yaradılması istiqamətində ardıcıl tədbirlər görülür, geniş elmi-tədqiqat işləri aparılır.
İyunun 18-də Naxçıvan Muxtar Respublikası Ali Məclisinin Sədri Vasif Talıbov Nəbatat bağına gəlmiş, burada görülən işlərlə maraqlanmışdır.
Məlumat verilmişdir ki, Nəbatat bağının sahəsi 13,2 hektar, muxtar respublika üzrə balansında olan torpaqların sahəsi isə 80 hektardan artıqdır. Burada ayrı-ayrı flora nümunələri üçün sahələr, təcrübə yerləri, nadir bitkilər kolleksiyası, tingçilik sahələri, həmçinin meyvə genofondu bağı yaradılmışdır. Bu da yerli və məhsuldar toxum sortlarının bərpası baxımından mühüm əhəmiyyət daşıyır.
Nəbatat bağında “Ultra Sera” ailəsinə məxsus son texnologiyaya malik istilikxana quraşdırılmışdır. İstilikxana tam avtomatlaşdırılmış iqlim nəzarət, istilik, havalandırma və suvarma sistemləri ilə təchiz edilmişdir. Müasir texnologiyaların tətbiqi bitkilərin normal inkişafına imkan verir. Burada sitrus, Hind-Çin, Afrika, Avstraliya, Ərəbistan və digər bu kimi mənşəli bitkilər olmaqla, 10 bölmə yaradılmış və 100-ə yaxın bitki əkilmişdir. Artıq bu bitki növlərinin bəziləri muxtar respublikanın iqlim şəraitinə uyğunlaşdırılmış və açıq havada çoxaldılmasına başlanılmışdır. Həmçinin təcrübə sahələrində Naxçıvan Dövlət Universitetinin biologiya və coğrafiya ixtisaslarının tələbələrinin iştirakı ilə açıq dərslər keçirilir.
Ali Məclisin Sədri Nəbatat bağının fəaliyyətinin genişləndirilməsinin vacibliyini vurğulamış, bu məqsədlə təsərrüfathesablı müəssisənin yaradılması, tingçilik sahələrinin genişləndirilməsi, toxum genofondunun formalaşdırılması, müəyyənləşdirilən məhsuldar toxum sortlarının “Araz” Elm İstehsalat Birliyi ilə birlikdə təsərrüfatlara paylanılması barədə tapşırıqlar vermişdir.
Naxçıvan Muxtar Respublikası
Ali Məclisinin mətbuat xidməti
