Muxtar respublikada hərbi hissələrə sovqatların verilməsi davam etdirilir.

Növbəti dəfə xalq-ordu birliyinə nümunə olaraq əsgərlərimiz üçün Babək rayonunun Nehrəm qəsəbəsində fəaliyyət göstərən “Sumqala” üzümçülük təsərrüfatında yetişdirilən 18 ton üzüm və 5 ton alma Naxçıvan Qarnizonuna təhvil verilib.

Bu münasibətlə əsgərlərlə keçirilən görüşdə təsərrüfatın baş aqronomu İsgəndər Abdullayev muxtar respublikada sahibkarlığa göstərilən diqqət və qayğıdan bəhs edib, əsgərlərə sovqat verilməsini xalq-ordu birliyinin möhkəm təməllərə əsaslandığının göstəricisi olduğunu qeyd edib.

Polkovnik-leytenant İlkin Nəsirov, mayor Orxan Seyidov və əsgər Əli Əhmədov xalq-ordu həmrəyliyindən danışıb, göstərilən diqqət və qayğıya görə minnətdarlıq ediblər.