Cəfər İbrahim oğlu Cəfərov 1985-ci ildə Babək rayonunun Cəhri kəndində anadan olmuşdu. İlk təhsilini kənd məktəbində alan Cəfər 2003-cü ildə Heydər Əliyev adına Hərbi Liseyi, 2007-ci ildə Heydər Əliyev adına Azərbaycan Ali Hərbi Məktəbini bitirmişdi. 2009-cu ildə “N” hərbi hissədə taqım komandiri vəzifəsində xidmətə başlamışdı. Bir qədər sonra motoatıcı bölük komandiri vəzifəsinə təyin olunmuşdu. Hər iki vəzifədə komandirlərin tapşırıqlarını layiqincə yerinə yetirən Cəfər Cəfərov 2010-cu ildə baş leytenant rütbəsi almışdı. Hərbi xidmətdə olduğu qısa müddət ərzində hissə komandirliyinin, zabit yoldaşlarının, əsgərlərin dərin hörmətini qazanmışdı. Düşmən tapdağında olan torpaqlarımızın geri qaytarılması arzusu ilə yaşayan, 2012-ci il iyul ayının 20-də Tovuz rayonunun Əlibəyli kəndində döyüş tapşırığını yerinə yetirərkən şəhid olan gənc zabitin Vətənimiz qarşısında xidməti əvəzsiz qalmamışdır. O, ölümündən sonra “Hərbi xidmətdə fərqlənməyə görə” üçüncü dərəcəli medala layiq görülmüşdür.
Medalın şəhid zabitin valideynlərinə təqdim olunması münasibətilə Naxçıvan Qarnizonunda tədbir keçirilmişdir. Tədbirdə çıxış edən qarnizon rəisi, general-leytenant Kərəm Mustafayev Cəfər Cəfərovun hərbi xidmətdə keçdiyi yoldan danışmış, belə ömrün hər bir gənc üçün örnək olduğunu vurğulamış, onun valideynləri İbrahim və Familə Cəfərovlara belə övlad böyütdükləri üçün minnətdarlığını bildirmişdir.
Şəhid atası İbrahim Cəfərov oğluna göstərilən belə diqqət üçün ailəsi adından dövlətimizə minnətdarlıq etmişdir.
Xəbərlər şöbəsi
