Xalqımızın ümummilli lideri Heydər Əliyevin 90 illik yubileyi ilə əlaqədar dünən Naxçıvan Muxtar Respublikası Həmkarlar İttifaqları Şurasında da tədbir keçirilmişdir. Tədbiri giriş sözü ilə şuranın sədri Sucaxan Novruzov açaraq məruzə etmişdir. Bildirilmişdir ki, xalqımızın böyük oğlu Heydər Əliyev hər zaman xalqını, Vətənini düşünmüş, Azərbaycanın müstəqilliyinin möhkəmləndirilməsi, doğma xalqının xoşbəxtliyi uğrunda mübarizə aparmışdır.
Qeyd olunmuşdur ki, çoxəsrlik dövlətçiliyimiz tarixində müstəsna yeri olan görkəmli dövlət xadimi Heydər Əliyevin fəaliyyəti öz əhəmiyyəti baxımından Azərbaycanın hüdudlarından çox-çox kənarlara çıxır. Ulu öndər parlaq siyasi zəkası və istedadı sayəsində yeni Azərbaycanı, onun bugünkü gerçəkliklərini yaratmış və gələcəyə aparan uğurlu yolu müəyyənləşdirmişdir. Məhz buna görə Azərbaycan tarixinin 1969-cu ildən bəri yaşanan dövrü ümummilli lider Heydər Əliyevin adı ilə sıx bağlıdır və tariximizə Heydər Əliyev dövrü kimi həkk olunmuşdur.
“Azərbaycanın müstəqil dövlət quruculuğu yolu, əslində, 1969-cu ildən – məhz ümummilli lider Heydər Əliyevin hakimiyyətə gəlişindən sonra başlamışdır”, – deyən şura sədri vurğulamışdır ki, müstəqil Azərbaycan dövlətçiliyinin inkişaf fəlsəfəsi olan Azərbaycançılığın ən parlaq səhifələri də elə həmin illərdən etibarən yazılmışdır. Bu baxımdan müdrik rəhbər Heydər Əliyevin respublika rəhbərliyinə ilk gəlişindən sonrakı dövr milli özünüdərkin, milli özünəqayıdışın başlanğıcı kimi qəbul edilir.
Bu gün ümummilli liderimizin ideyaları ölkəmizdə, eləcə də muxtar respublikamızda yaradıcılıqla həyata keçirilir. Ölkəmizin bu gün dünya miqyasında qazandığı böyük nüfuz, nəhəng dövlətlərlə edilən tərəfdaşlıq bir daha sübut edir ki, Heydər Əliyev yolunun alternativi yoxdur və bu yol Vətənimizi yeni-yeni uğurlara, zəfərlərə aparır.
Tədbirdə şura əməkdaşlarından Yusif Cəfərovun, Səbuhi Hüseynovun, Yəmən Rzayevanın və başqalarının çıxışları olmuşdur.
Xəbərlər şöbəsi
