Aprelin 27-də muxtar respublikanın şəhər və rayonlarında keçirilən iməciliklər mütəşəkkilliyi ilə yadda qalmışdır.
Naxçıvan şəhərinin ictimaiyyəti Naxçıvan-Sədərək magistral yolunun kənarına, Nəzərabad kəndi yaxınlığındakı terrasdakı və şəhərin müxtəlif ərazilərindəki yaşıllıqlara aqrotexniki qulluq göstərmişlər.
Şərur rayonunda keçirilən iməciliklərdə də əhalinin mütəşəkkilliyi müşahidə edilmişdir. Naxçıvan-Sədərək magistral yolunun Aşağı Daşarx, Xanlıqlar və Püsyan kəndlərindən keçən hissəsində ağaclara aqrotexniki qulluq göstərilmiş, su arxları təmizlənmiş, 1,4 hektarlıq ərazidə 10 min 150 ədəd gül şitili əkilmişdir.
Babək rayonunun sakinləri isə Naxçıvan-Ordubad magistral yolunun kənarlarındakı bağlara aqrotexniki qulluq göstərmişlər.
Ordubad rayonunun sakinləri Naxçıvan-Ordubad magistral yolunun kənarlarına, şəhərdə yeni inşa olunmuş uşaq bağçasının həyətinə 460 ədəd gül, 55 ədəd həmişəyaşıl, 50 ədəd meyvə ağacı əkmişlər.
Culfalılar Naxçıvan-Ordubad magistral yolunun kənarlarındakı bağlara aqrotexniki qulluq göstərmiş, su arxlarını təmizləmişlər.
Kəngərli sakinləri Naxçıvan-Sədərək magistral yolunun kənarlarındakı bağlarda 640 ədəd meyvə, 120 ədəd meşə ağacı əkmişlər.
Şahbuz rayonunun Daylaqlı və İşgəsu massivlərində 1,5 hektarlıq sahədə 530 ədəd meyvə, 210 ədəd meşə ağacı, rayon ərazisindəki parklara 157 ədəd həmişəyaşıl ağac əkilmişdir.
Sədərək rayonunun müxtəlif ərazilərinə 5000 ədəd gül şitili əkilmiş, Heydərabad qəsəbəsindəki 4,8 hektarlıq meyvə bağına aqrotexniki qulluq göstərilmiş və ağaclar suvarılmışdır.
İməciliklərdə, ümumilikdə, 25 min 215 nəfər iştirak etmiş, 17 min 372 ədəd ağac və bəzək kolları əkilmişdir.
Həmin gün muxtar respublikamızın bütün bölgələrində ahıl vətəndaşların həyətlərində təmizlik, abadlıq işləri aparılmışdır.

Xəbərlər şöbəsi