Naxçıvan Dövlət Universitetində Yeni Azərbaycan Partiyası universitet şəhərciyi ərazi ilk təşkilatının təşkilatçılığı, İqtisad, Sosial idarəetmə və hüquq fakültələrinin birgə iştirakı ilə ümummilli lider Heydər Əliyevin 90 illik yubileyinə həsr olunmuş konfrans keçirilmişdir. Konfransı giriş sözü ilə universitetin rektoru, akademik İsa Həbibbəyli açaraq dünya şöhrətli siyasi xadim, ulu öndər Heydər Əliyevin Azərbaycanın milli müstəqilliyinin qorunmasındakı xidmətlərindən danışmışdır. Qeyd olunmuşdur ki, görkəmli dövlət xadimi Heydər Əliyevin uzaqgörən siyasəti nəticəsində Azərbaycançılıq məfkurəsi müstəqil dövlətimizin ümummilli ideologiyasına çevrilmişdir. Vurğulanmışdır ki, ulu öndər Heydər Əliyevin anadan olmasının 90 illik yubileyinin qeyd olunması ilə əlaqədar ölkə Prezidenti cənab İlham Əliyevin 21 yanvar 2013-cü il tarixli Sərəncamı, 2013-cü ilin Naxçıvan Muxtar Respublikasında “Heydər Əliyev ili” elan olunması ümummilli liderin həyat və siyasi fəaliyyətinin öyrənilməsi və təbliği baxımından mühüm əhəmiyyətə malikdir.
YAP universitet şəhərciyi ərazi ilk təşkilatı idarə heyətinin üzvü, İqtisad fakültəsinin dekan müavini, iqtisad üzrə fəlsəfə doktoru, dosent Müslüm Cabbarzadə “Ümummilli lider Heydər Əliyevin iqtisadi islahat strategiyası” mövzusundakı məruzəsində dahi rəhbərin hakimiyyətə gəlişi ilə qısa müddət ərzində ölkədə siyasi və makroiqtisadi sabitliyin təmin olunduğunu, Azərbaycanın uzunmüddətli inkişaf strategiyasının əsasının qoyulduğunu, insan hüquqları, demokratikləşmə, iqtisadi sahədə fundamental tədbirlərin reallaşdırıldığını, köklü islahatların aparıldığını və xarici sərmayənin cəlb edilməsi üçün əlverişli mühitin yaradıldığını bildirmişdir.
Hüquqşünaslıq ixtisasının II kurs tələbəsi, Tələbə Hüquq Maarifləndirmə Mərkəzinin sədri Vüsal Məmmədov “Ulu öndər Heydər Əliyev və Azərbaycanda hüquqi dövlət quruculuğu” mövzusunda məruzə etmişdir.
Sonra YAP sıralarına qəbul edilmiş tələbələrə üzvlük vəsiqələri təqdim olunmuşdur.
Sonda ümummilli lider Heydər Əliyevin həyat və fəaliyyətinə həsr olunmuş videoçarx nümayiş etdirilmişdir.

Mina Qasımova