Naxçıvan Dövlət Film Fondunda Naxçıvan Muxtar Respublikası Fövqəladə Hallar Nazirliyinin təşkilatçılığı ilə “Mülki müdafiə, fövqəladə hallardan qorunma və yanğın təhlükəsizliyi” mövzusunda maarifləndirici tədbir keçirilib. Muzey əməkdaşlarının iştirak etdiyi yığıncağı giriş sözü ilə açan Naxçıvan Muxtar Respublikası Mədəniyyət və Turizm Nazirliyinin aparıcı məsləhətçisi İsfəndiyar İsmayılov maarifləndirici tədbirin əhəmiyyətindən danışıb.
Tədbirdə Naxçıvan Muxtar Respublikası Fövqəladə Hallar Nazirliyi Mülki müdafiə işinin təşkili şöbəsinin əməkdaşı Şərif Əsədovun “Mülki müdafiənin xəbərdarlıq siqnalları üzrə fəaliyyətin təşkili. Dəm qazı, ondan müdafiə üsulları”, həmin şöbənin rəis köməkçisi Rəcəb Səfərovun “Muzeylərdə mülki müdafiə işinin təşkili və yanğın təhlükəsizliyi qaydaları”, mülki müdafiə kursunun müəllimlərindən Çingiz Kazımovun və Afaq Hüseynlinin “Fövqəladə hallar zamanı davranış qaydaları” və “Fövqəladə hallar zamanı özünəyardımı və qarşılıqlı yardım göstərməyi hamı bacarmalıdır” mövzularında məruzələri dinlənilib. Məruzələrdə qeyd olunub ki, qış mövsümündə yanğın, məişət cihazlarının partlayışı və dəm qazından zəhərlənmə hallarına daha çox rast gəlinir.

Bu halların baş verməməsi üçün təhlükəsizlik qaydalarına ciddi əməl olunmalıdır. Baş verə biləcək təbii və texnogen xarakterli hadisələrin qarşısının operativ surətdə alınması üçün belə hadisələr zamanı düzgün davranış qaydaları barədə bilikləri artırmaq vacibdir. Hadisə zamanı insanların özünüxilas və ətrafdakılara yardım edilməsi qaydalarının öyrənilməsi həmin hadisənin fəsadlarından bacardıqca xilasolunma baxımından olduqca əhəmiyyətlidir.
Sonda tədbir iştirakçılarını maraqlandıran suallar cavablandırılmış, videomateriallar nümayiş etdirilmişdir.

*   *   *

Analoji tədbir Naxçıvan şəhərindəki Ərtoğrol Cavid adına Uşaq İncəsənət və Bədii Sənətkarlıq Məktəbində də keçirilmişdir. Tədbirdə Fövqəladə Hallar Nazirliyinin əməkdaşlarından Mirtaleh Seyidovun, Azər Qasımovun, Əbülfəz Qafarovun və Hasil Məmmədovun çıxışları olmuşdur.
Sonda tədbir iştirakçılarına yanğınsöndürmə və xilasetmə vasitələri nümayiş etdirilmiş, yaddaş kitabçaları paylanmışdır.

Əli RZAYEV