Ordubad rayonunun Sabirkənd kəndində “Payız-qış mövsümündə meyvə və üzüm bağlarında aparılacaq aqrotexniki tədbirlər və kənd təsərrüfatı texnikalarının saz vəziyyətdə olmasının əhəmiyyəti” mövzusunda tədbir keçirilib.
Tədbiri giriş sözü ilə Ordubad Rayon İcra Hakimiyyətinin əməkdaşı Zamiq Babayev açaraq meyvəçiliyin inkişaf etdirildiyi Ordubad rayonunda gələcəkdə bol məhsulun əldə olunması üçün bağlarda aqrotexniki tədbirlərin görülməsinin vacibliyini vurğulayıb.
Naxçıvan Muxtar Respublikası Kənd Təsərrüfatı Nazirliyinin əməkdaşı Xaliq Abbasov payız-qış mövsümündə meyvə və üzüm bağlarında aparılacaq aqrotexniki tədbirlər haqqında məlumat verərək bildirib ki, yeni meyvə bağlarının salınmasında aborigen sortlardan istifadə edilməli, muxtar respublikanın iqlim şəraitinə asan uyğunlaşan rayonlaşdırılmış meyvə ağaclarının əkininə önəm verilməlidir. Tinglər payız mövsümündə sükunət dövrünə keçdiyindən onların tutma ehtimalı daha çoxdur. Buna görə də havaların mülayim keçməsindən istifadə edərək yeni meyvə bağlarının salınması işləri davam etdirilməlidir.
Çıxışda meyvə bağlarında, xəstəlik və zərərvericilərə qarşı mübarizə aparmaq məqsədilə görülməsi zəruri olan tədbirlərdən də danışılıb.
Nazirliyin Texniki nəzarət və aqroservis sektorunun müdiri Valeh Mehdiyev qeyd edib ki, torpaq mülkiyyətçilərinin kənd təsərrüfatı texnikası və avadanlıqlarına olan tələbatının ödənilməsi istiqamətində son illərdə “Naxçıvan Aqrolizinq” Açıq Səhmdar Cəmiyyəti tərəfindən muxtar respublikaya 2400-ə yaxın, cari ilin ötən dövrü ərzində isə 300-dən çox texnika və texnoloji avadanlıq gətirilərək fermer və mülkiyyətçilərə lizinq yolu ilə icarəyə verilib.
Çıxışda traktor və kənd təsərrüfatı texnikalarının yaz aylarında fasiləsiz və dayanıqlı istismarını təmin etmək məqsədilə nəzərdə tutulan tədbirlərdən də bəhs edilib.
Sonda iştirakçıları maraqlandıran suallar cavablandırılıb. Mütəxəssislərin hazırladıqları buklet və informasiya kitabçaları torpaq mülkiyyətçilərinə təqdim edilib.
Naxçıvan Muxtar Respublikası
Kənd Təsərrüfatı Nazirliyinin mətbuat xidməti
