Muxtar respublikada işaxtaranların məşğulluğunun təmin olunması, peşə hazırlığı, əməyin təşkili və mühafizəsi, aztəminatlı ailələrin, ahıl və sağlamlıq imkanları məhdud şəxslərin sosial təminatı, tibbi və sosial reabilitasiyası ilə bağlı müvafiq tədbirlər həyata keçirilir.
Noyabr ayında da bu məsələ diqqətdə saxlanılmış, 330 nəfər məşğulluq xidməti orqanlarında qeydiyyatda olan vakant iş yerlərinə göndərilmiş, 8 nəfər kəndlərdə xidmət mərkəzlərində müvafiq işlə təmin olunmuş, 65 nəfər peşə və 29 nəfər ixtisasartırma kurslarına, 47 nəfər haqqıödənilən ictimai işlərə cəlb edilmişdir. Bu dövrdə məhdud fiziki imkanlı 23 sakin tərəfindən toxunmuş 1816 cüt yun corab və 236 ədəd yun şərf hərbi hissələrə təhvil verilmişdir.
Naxçıvan Regional Peşə Tədris Mərkəzində əmək bazarının tələbləri nəzərə alınaraq müxtəlif peşə sahələri üzrə kurslar təşkil olunmuşdur. “Qazanxana maşinisti”, “Qaz avadanlıqlarının istismarı və təmiri üzrə çilingər” və “Dayə” peşələri üzrə kursları 81 nəfər bitirmişdir. Sağlamlıq imkanları məhdud uşaqların cəmiyyətə və təhsilə inteqrasiyası diqqət mərkəzində saxlanılmış, aztəminatlı sağlamlıq imkanları məhdud 273 şagirdə qış geyimi verilmişdir. Noyabr ayı tənha yaşayan və başqasının yardımına ehtiyacı olan 422 ahıl və fiziki imkanları məhdud şəxslərə evlərində, həmçinin 16 nəfərə Ahıllar evində stasionar sosial xidmət göstərilmişdir. Naxçıvan Əlillərin Bərpa Mərkəzində sağlamlıq imkanları məhdud 26 şəxsin, Naxçıvan Uşaq Bərpa Mərkəzində sağlamlıq imkanları məhdud 28 uşağın müalicəsi təşkil edilmiş, eyni zamanda 12 nəfərə sanatoriya və pansionatlara göndəriş verilmiş, 13 nəfər texniki reabilitasiya vasitəsilə təmin olunmuş, 3 nəfərin sosial məişət şəraitinin yaxşılaşmasına köməklik göstərilmişdir.
Məhdud Fiziki İmkanlılar üçün Naxçıvan Regional İnformasiya Mərkəzində brayl yazı və şeir müsabiqələri keçirilmişdir. Sumqayıt şəhərində keçirilən II uşaq paralimpiya idman oyunlarında muxtar respublikanı stolüstü tennis və boccia idman növü üzrə sağlamlıq imkanları məhdud 3 idmançı təmsil etmişdir. Boccia idman növü üzrə yarışlarda həmyerlilərimiz 1-ci və 3-cü yerlərə layiq görülmüşlər. Bakı şəhərində keçirilən sağlamlıq imkanları məhdud şəxslərin VII Ümumrespublika Bədii Yaradıcılıq müsabiqəsində isə muxtar respublika təmsilçisi bədii qiraət üzrə 3-cü yerə layiq görülmüşdür.
Naxçıvan Muxtar Respublikası Əmək və Əhalinin Sosial
Müdafiəsi Nazirliyinin mətbuat xidməti
