Naxçıvan Muxtar Respublikası Səhiyyə Nazirliyinin iş planına uyğun olaraq, yay mövsümünü yaylaqlarda keçirən heyvandarlara, onların ailələrinə göstərilən səhiyyə xidməti davam etdirilir.
Ordubad Rayon Mərkəzi Xəstəxanasının terapevt, kardioloq, cərrah, stomatoloq və pediatrlardan ibarət çoxprofilli həkim briqadası Göygöl ərazisindəki yaylaqlarda məskunlaşan heyvandarlara baş çəkib. Hazırda təkcə Əyriçay yaylağında 2 oba məskən salıb. Onların öhdəsində 5 min başa yaxın mal-qara, qoyun-quzu var. Çadırlarda Kəngərli rayonunun Çalxanqala kəndindən gəlmiş fermer və çobanların 32 ailə üzvü yaşayır. Briqadanın fəaliyyəti zamanı onların hamısı profilaktik tibbi müayinəyə cəlb olunub, pediatrik, kardioloji, cərrahi, stomatoloji müayinələr aparılıb. Yaylaqda arana nisbətən havaların sərin keçməsi səbəbindən obalardakı azyaşlı uşaqların bir qismində qulaqağrısı və yuxarı tənəffüs yollarının patologiyası müşahidə olunub, onların müalicəsi ilə bağlı lazımi dərmanlar verilib.
Ordubad Rayon Gigiyena və Epidemiologiya Mərkəzi tərəfindən obalarda dezinfeksiya, dezinseksiya tədbirləri həyata keçirilib, gigiyenik qaydalara əməl olunması barədə səhiyyə maarifi işi aparılıb.
Şahbuz rayonunun heyvandarlıqla məşğul olmaq üçün münbit şəraitli yaylaqlarında təkcə yerli fermerlər deyil, həmçinin Şərur rayonunun Xanlıqlar və Kəngərli rayonunun Qarabağlar kəndlərindən və digər bölgələrdən gələn təsərrüfat sahibləri də ailəliklə oba qurub heyvandarlıqla məşğul olurlar. Onların sağlamlıqları daim diqqət mərkəzində saxlanılır. Babək Rayon Mərkəzi Xəstəxanasının həkim briqadası ərazidəki Vayxıryurd obalarında olub. Terapevt, stomatoloq və pediatrlardan ibarət həkim briqadası 4 çadırda məskunlaşan 13 nəfəri profilaktik tibbi müayinələrdən keçirib, ilkin tibbi yardım üçün dərmanlar paylanıb.
Ötən həftə Culfa Rayon Mərkəzi Xəstəxanasının həkim briqadası isə rayonun Dəmirli yaylağı ərazisində Camaldın kəndindən məskunlaşan heyvandarlara tibbi xidmət göstərib. Heyvandarlar belə xidmətə görə minnətdarlıqlarını bildiriblər.
Obalarda tibbi xidmət mövsüm boyu davam etdiriləcəkdir.
Hüseyn ƏSGƏROV
