Dünən Naxçıvan Muxtar Respublikası Rəssamlar Birliyinin Bəhruz Kəngərli adına Sərgi Salonunda birliyin nəzdində yeni yaradılan Gənc rəssamlar bölməsi üzvlərinin hesabat sərgisi və onlara üzvlük vəsiqələrinin təqdimatı keçirilib.
Tədbirdə Naxçıvan Muxtar Respublikası Rəssamlar Birliyinin sədri, Azərbaycan Respublikasının Əməkdar rəssamı Ülviyyə Həmzəyeva çıxış edərək bildirib ki, Naxçıvan Muxtar Respublikası Rəssamlar Birliyinin nəzdində ilk dəfə olaraq yaradılan Gənc rəssamlar bölməsi muxtar respublikada rəssamlıqla məşğul olan gənclərin yoluna işıq olacaq. Buraya üzv olan və yaxud üzv olmaq istəyən gənclər professional rəssamlarımızla bir yerdə işləyə, fikir mübadilələri apara, yeni layihələr irəli sürə biləcəklər. Gələcəkdə onların sərgilərinin keçirilməsi də nəzərdə tutulur.
Vurğulanıb ki, bu gün hesabat sərgisi keçirilən, eləcə də üzvlüyə qəbul edəcəyimiz gənclər içərisində muxtar respublikanın ali və orta ixtisas müəssisələrinin tələbələri, eləcə də Azərbaycan Dövlət Rəssamlıq Akademiyasında təhsil alan həvəskar rəssamlar iştirak edir. Onların içərisində təsviri incəsənət və rəngkarlıq ixtisasında, həmçinin qeyri-ixtisas fənləri üzrə təhsil alan gənclər də vardır. Biz həm də imkan yaradırıq ki, qeyri-ixtisaslar üzrə təhsil alan, lakin rəssamlığa böyük maraqgöstərən gənclərimizin də bu vasitə ilə potensialları üzə çıxarılsın.
Tədbirdə Azərbaycan Respublikasının Əməkdar rəssamı Telman Abdinov, Naxçıvan Muxtar Respublikasının Əməkdar rəssamları Məhəmmədəli Ələkbərov və Əli Səfərov, Naxçıvan Dövlət Universitetinin İncəsənət fakültəsinin dekanı Cavid İsmayılov, Naxçıvan Müəllimlər İnstitutunun Təbiət və incəsənət fakültəsinin dekanı Rövşən Vəliyev və digərləri çıxış edərək sərgisi təşkil olunan gənc rəssamlar barədə fikirlərini bölüşüb, onlara tövsiyələrini verib, fəaliyyətlərində uğurlar arzulayıblar.
Gənclərə Rəssamlar Birliyinin diplomları və Gənc rəssamlar bölməsinə üzvlük vəsiqələri təqdim edildikdən sonra sərgiyə baxış olub. Sərgidə 25 gənc rəssamın dekorativ-tətbiqi sənət, rəngkarlıq, qrafika növünə aid mənzərə, natürmort, portret janrlarında müxtəlif mövzularda 75 rəsm əsəri nümayiş etdirilib.
- Güntac ŞAHMƏMMƏDLİ
