Azərbaycan Respublikası Təhsil Nazirliyinin Uşaq-Gənclər İnkişaf Mərkəzi tərəfindən 7 may-1 iyun tarixlərində “Üç alov” adlı beynəlxalq folklor, klassik və müasir yaradıcılıq festivalı keçirilib.
Mövcud vəziyyətlə bağlı onlayn şəkildə keçirilən festivalın əsas məqsədi Azərbaycan və xarici ölkələrin adət-ənənə və zəngin mədəni irslərinin öyrənilməsi, qorunub saxlanması və inkişafı, ənənəvi folklor, klassik, müasir incəsənətin müxtəlif istiqamətləri üzrə uşaq və gənclərin cəlb edilməsi, xarici ölkələrin kollektivləri ilə yaradıcılıq nailiyyətlərinin mübadiləsi, incəsənət sahəsində ən istedadlı, perspektivli uşaq və gənclərin aşkara çıxarılması, həmçinin onların bədii-estetik səviyyəsinin yüksəldilməsindən ibarətdir.
Müsabiqədə Naxçıvan şəhər 1 nömrəli tam orta məktəbin 7-ci sinif şagirdi Bayram Tahirov Rəqs, Naxçıvan şəhər 8 nömrəli tam orta məktəbin 7-ci sinif şagirdi Məleykə Vəliyeva isə Klassik instrumental ifaçılıq nominasiyası üzrə onlayn şəkildə iştirak ediblər. Hər iki şagirdin çıxışı qiymətləndirilərək həvəsləndirici yerə layiq görülüb. Uğur qazanan şagirdlər Qran Pri diplomu ilə mükafatlandırılacaq.
Qeyd edək ki, hər il keçirilən “Üç alov” Beynəlxalq Yaradıcılıq Festivalında naxçıvanlı məktəblilər ilk dəfə iştirak ediblər.
Naxçıvan Muxtar Respublikası
Təhsil Nazirliyinin mətbuat xidməti