Naxçıvan şəhərindəki İlham Əliyev adına Olimpiya-İdman Kompleksinin Üzgüçülük Mərkəzində 12 avqust – Beynəlxalq Gənclər Günü münasibətilə qızlar arasında üzgüçülük üzrə şəhər birinciliyi keçirilib.
Naxçıvan Şəhər Gənclər və İdman İdarəsi və Olimpiya-İdman Kompleksinin birgə təşkil etdiyi birincilikdə 30 idmançı 3 yaş qrupunda mübarizə aparıb. Üzgüçülüyün sərbəst üsulu üzrə 25 metr məsafədə keçirilən yarışın yekun nəticəsinə əsasən 2001-2003-cü illər təvəllüdlü idmançılar arasında Nərmin Həsənova, 2004-2006-cı illər təvəllüdlü idmançılar arasında Gülan Əhmədova və 2007-2008-ci illər təvəllüdlü idmançılar arasında Röya Məmmədova qalib adını qazanıblar.
Sonda idmançılar diplomlarla təltif olunublar.
* * *
12 avqust – Beynəlxalq Gənclər Günü münasibətilə Naxçıvan Şahmat Mərkəzində gənclər arasında şahmat üzrə Naxçıvan Muxtar Respublika birinciliyi keçirilib.
Naxçıvan Muxtar Respublikası Gənclər və İdman Nazirliyinin və Şahmat Federasiyasının birgə təşkilatçılığı ilə olimpiya sistemi üzrə keçirilən birincilikdə 50 nəfər şahmatçı iştirak edib. Yarışın yekununa əsasən Əli Qulamzadə I, Ayxan Əliyev II, Həsən Rəhimov isə III yerlərə layiq görülüblər.
Naxçıvan Muxtar Respublikası
Gənclər və İdman Nazirliyinin
mətbuat xidməti